SSV: vazir talaba-yoshlar bilan muloqot qildi

Sog’liqni saqlash vaziri Asilbek Xudayarov Toshkent davlat tibbiyot universiteti talabalari bilan uchrashdi.

Muloqotda yoshlar bilan ishlash samaradorligini yanada oshirish, ularda korrupsiyaga nisbatan murosasiz munosabatni shakllantirish, «Sog’liqni saqlash sohasida korrupsiyaga qarshi kurashish» mavzusida maxsus o’quv kurslarini yo’lga qo’yish masalalari atroflicha muhokama qilindi.

Ta’kidlanganidek, bugun Prezidentimiz tomonidan olib borilayotgan islohotlar negizida kadrlar tayyorlash sifatini oshirishdek ezgu maqsad yotadi. Buni esa Toshkent davlat tibbiyot universiteti faoliyati misolida ham ko’rish mumkin.

Aytish lozimki, mazkur dargoh davlatimiz rahbarining tegishli qaroriga muvofiq yurtimizdagi 3 ta mustaqil oliy ta’lim muassasasi negizida tashkil etilgan bo’lib, bu erda 30 ming nafardan ortiq talabalarning chuqur bilim olishlari va tanlagan sohalari bo’yicha etuk mutaxassis bo’lib etishishlari uchun barcha shart-sharoitlar mavjud.

Uchrashuvda 2025/2026 o’quv yili mazkur oliy o’quv yurtida «Toshkent davlat tibbiyot universiteti — korrupsiyadan xoli hudud» shiori ostida o’tishi belgilanib, bu bo’yicha alohida dastur joriy qilingani ta’kidlandi.

Shuningdek, yangi o’quv yilidan universitetning bakalavriat (5-6-bosqich), ordinatura va magistratura (2-bosqich) talabalarini «tibbiyotda korrupsiyaning oldini olish» mavzusida o’qitish tizimi yo’lga qo’yilgani qayd etildi.

Sog’liqni saqlash vazirligi
Matbuot xizmati.