SSV: tibbiyotni raqamlashtirish ishlari tanqidiy tahlil qilindi

Tibbiyot tizimini raqamlashtirish — soha oldida turgan eng muhim vazifa. Shu bois mamlakatimizda bu masalaga alohida e’tibor qaratilmoqda.

Sog’liqni saqlash vaziri o’rinbosari olim Omonov boshchiligida bo’lib o’tgan videokonferentsaloqa shaklidagi yig’ilishda mazkur yo’nalishda amalga oshirilayotgan ishlar atroflicha tahlil qilindi. (https://t.me/ssvuz/19438)

Ta’kidlanganidek, Prezidentimizning 2023 yil 28 dekabrdagi tegishli qaroriga muvofiq tibbiyot muassasalari va dorixonalarda «elektron resept» modulidan foydalanish belgilangan. Qolaversa, joriy yil 8 sentyabrda Vazirlar Mahkamasining ushbu vazifalar ijrosiga qaratilgan qarori qabul qilindi.

Yig’ilishda mazkur hujjatlarda belgilangan vazifalar ijrosini ta’minlash borasida qator ishlar amalga oshirilayotgani, ammo natijalar hamma joyda ham qoniqarli emasligi alohida qayd etildi.

Xususan, Toshkent shahrida joylashgan respublika darajasidagi 37 ta markaz va 14 ta davolash muassasasi tomonidan «elektron resept» tizimini joriy etish bo’yicha amaliy choralar ko’rilmagan. Hatto, haligacha DMED dasturi o’rnatilmagan tibbiyot maskanlari mavjud.

Bundan tashqari, «laboratoriya» va «kassa» modullaridan foydalanish darajasi qoniqarli emas.

Shu bois vazir o’rinbosari barcha tibbiyot muassasalarida DMED dasturini to’liq yo’lga qo’yish, uning barcha modullaridan samarali foydalanish, shifokorlarni zarur kompyuter qurilmalari va chek printerlari bilan ta’minlash hamda xodimlar malakasini oshirish lozimligini aytib o’tdi.

O’z navbatida, bu boradagi mavjud kamchiliklarni qisqa muddatda bartaraf etish bo’yicha mas’ullarga aniq topshiriqlar berildi.

Shuningdek, yig’ilish yakunida sohani rivojlantirish bo’yicha qator takliflar hamda ularning samarali echimlari o’rtaga tashlandi.

Sog’liqni saqlash vazirligi
Matbuot xizmati.