Muhammad Yusuf. Hayot bu | Муҳаммад Юсуф. Ҳаёт бу

ҲАЁТ БУ

Бир кун хурсанд яшаш
Қанчалар қийин,
Бир кунгина —
Тонгдан шомгача.
Ҳаёт ҳар лаҳзаси,
Ҳар они ўйин,
Бошқача,
Бошқача,
Бошқача.

Қара,
Тонгда ўпган эдим юзингдан,
Энди қўл силтадим,
Бегона мисол.
Ёруғ дунёда-ку,
Кўрким ўзингсан,
Бир кунда энг бахтли,
Энг бахтсиз Аёл!.

Асли
Менга сенинг кулгунг азиздир.
Жилмайсанг —
Жаҳоним жилмайгани шу.
Тонгинг баҳор эди,
Оқшоминг куздир,
Сени севаману
Аммо, ҳаёт — бу.

Эй менинг севгилим,
Осмонингдан туш,
Севги — ёмғир босган
Китобдаги байт.
Сен — менинг
Қўйнимда тўлғонган оққуш,
Мен — сенинг дардингга
Етмаган сайёд!.

Муҳаммад Юсуф

* * *

HAYOT BU

Bir kun xursand yashash
Qanchalar qiyin,
Bir kungina —
Tongdan shomgacha.
Hayot har lahzasi,
Har oni o‘yin,
Boshqacha,
Boshqacha,
Boshqacha…

Qara,
Tongda o‘pgan edim yuzingdan,
Endi qo‘l siltadim,
Begona misol.
Yorug‘ dunyoda-ku,
Ko‘rkim o‘zingsan,
Bir kunda eng baxtli,
Eng baxtsiz Ayol!.

Asli
Menga sening kulgung azizdir.
Jilmaysang —
Jahonim jilmaygani shu.
Tonging bahor edi,
Oqshoming kuzdir,
Seni sevamanu
Ammo, hayot — bu.

Ey mening sevgilim,
Osmoningdan tush,
Sevgi — yomg‘ir bosgan
Kitobdagi bayt.
Sen — mening
Qo‘ynimda to‘lg‘ongan oqqush,
Men — sening dardingga
Yetmagan sayyod!.

Muhammad Yusuf