Kамалган фуқаро МИБ ходими уни муштлашишга таклиф қилганини айтмоқда

АНДИЖОН (Turon24) – Суд томонидан 10 йилу 6 ой муддатга озодликдан маҳрум этилган фуқаронинг айтишича, жабрланувчи МИБ инспектори уни муштлашишга таклиф қилган.

“Билиб билмасдан жиноят қилдим, – дейди айбланувчи Ёдгор Охунов. – Мен улардан қарздорлигимни тўғри маънода сўрамоқчи бўлганимда муддат бермасдан электр тармоғидан узиб кетгани сабабли ушбу жиноят келиб чиқди. Мен қилган ишимдан пушаймонман. Барчадан кечирим сўрайман. Мақсадим ўлдириш бўлмаган. У мени ўз ҳудудига муштлашишга таклиф қилган. Кейин мен ўз машинамдан туриб “Қаерга десангиз бораман!” деганман”.

Воқеа 2018 йилнинг 19 июль куни Андижон тумани Бўтақора қишлоғи Март маҳалласида юз берган. 27 ёшли Ёдгор Охунов уйига қарз ундиришга келган МИБ ходими Баҳром Ҳакимқуловни пичоқлаганликда гумонланиб ҳибсга олинган. Мазкур ҳолат юзасидан жиноят иши қўзғатилган.

“Айбланувчининг электрдан 500 минг сўм қарзи борлиги учун у яшаётган хонадонни бир ҳафтача олдин электрдан узиб кетишган эди, – дейди исми сир қолишини истаган, воқеага гувоҳ бўлган фуқаро. – Шу йилнинг 19 июль куни кечга яқин МИБ ходими ушбу қарзни ундиришга келган. Ёдгор уйида бўлмаган, МИБ ходими билан жанжал бўлганидан сўнг, хотини уни телефон қилиб чақирган. У жанжалнинг устига етиб келган ва МИБ ходими билан айтишиб қолган. Жаҳл устида унга икки марта орқасидан пичоқ санчган”.

Жабрланувчи Баҳром Ҳакимқуловнинг айтишича, у ўзига тегишли ҳудудда хизмат вазифасини ўтаётган вақтида фуқаронинг уйига кириб, қарздорликни аниқлаган ва талабнома берган. Қарздор бунга норозилик билдириб, пичоқ билан жароҳат етказган.

Суд ҳукми билан айбланувчига узил-кесил 10 йил 6 ой озодликдан маҳрум қилиш жазоси тайинланди.

https://turon24.uz
https://facebook.com/Turon24uz
️ https://telegram.me/Turon24uzb
https://twitter.com/Turon24uz
https://instagram.com/turon24uz