IMOM BUXORIY XAZINASINI ASRAYOTGAN OʻZBEKISTONDAN MINNNATDORMIZ

#Videolar #Intervyu

“IMOM BUXORIY XAZINASINI ASRAYOTGAN OʻZBEKISTONDAN MINNNATDORMIZ”

Ahmad MUZANI – Indoneziya Respublikasi Xalq maslahati kengashi raisi

Alhamdulillah, bugun ulugʻ muhaddis Imom Buxoriy hazratlarining tabarruk qadamjosini ziyorat qilish va u zotning boy ilmiy merosini oʻrganishga ixtisoslashgan muazzam muassasangiz bilan tanishish baxtiga muyassar boʻldik.

Bu tashrif delegatsiyamiz uchun juda katta ahamiyatga ega. Chunki bizning Indoneziyada “Sahihul Buxoriy” kitobi kirib bormagan xonadon, uni oʻqimagan vatandosh yoʻq hisobi. Asrlar davomida ushbu shoh asar mamlakatimizning barcha islomiy taʼlim muassasalari, madrasa va diniy dargohlarida Qurʼoni karimdan keyingi eng asosiy va moʻtabar manba sifatida muntazam oʻqitib kelinadi. Shu bois, ulugʻ bobomizning ilmiy merosini mana shunday markazlarda chuqur tadqiq etish va uni zamon odamlariga mos tilda dunyoga taratish ishlari izchil davom ettirilishi nihoyatda muhimdir.

Bugun Indoneziyaning taniqli ulamolari, diniy tashkilotlar mutasaddilari va islom bilim yurtlari rahbarlaridan iborat delegatsiyamiz bilan birgalikda ushbu muborak maqbara poyida turish nasib etganidan Yaratganga behisob shukronalar aytamiz. Fursatdan foydalanib, bu tabarruk ziyoratgohni yuksak eʼtibor va cheksiz gʻamxoʻrlik bilan asrab-avaylayotgan, uni butun dunyo havas qiladigan maskanga aylantirayotgan Oʻzbekiston hukumatiga oʻz nomimizdan va xalqimiz nomidan minnatdorlik bildiramiz.

Imom Buxoriy nafaqat bagʻrikeng Oʻzbekiston zaminining, jamiki islom ummatining faxru iftixoridir. U zotning islom ilmlari rivoji yoʻlidagi xizmatlari beqiyos. Shu sababli ham biz, olisdagi Indoneziya xalqi, u zotning buyuk tafakkuri va merosi oldida hamisha chuqur ehtirom ila bosh egamiz.

Parvardigorimiz barchamizga kuch-quvvat bersin, toki mana shu olamshumul ilmiy xazinani kelgusi avlodlarga sof holda, omonlikda yetkazaylik. Bugungi vazifamiz Imom Buxoriy maqbarasini ziyorat qilishning oʻzigina emas, balki eng avvalo u zotning taʼlimotini, ilmiy merosini koʻz qorachigʻidek asrash va dunyo boʻylab keng targʻib qilishdir. Shundagina farzandlarimiz va nabiralarimiz ham buyuk ilm bulogʻidan bahramand boʻlib, maʼrifatli avlod boʻlib ulgʻayadi

(TAS-IX) HD da:
bukhari.uz/

Yaqinlaringizga ulashing!
️https://t.me/joinchat/QbkU7g8U6fc9nL35
🫥https://taplink.cc/bukhariuz