SAHIHUL BUXORIY” – INDONEZIYA VA OʻZBEKISTON ULAMOLARINI BOGʻLOVCHI ILMIY KOʻPRIK

#bukhariuz #Videolar #Intervyu #Stipendiat

““SAHIHUL BUXORIY” – INDONEZIYA VA OʻZBEKISTON ULAMOLARINI BOGʻLOVCHI ILMIY KOʻPRIK”

Ahmad HAVOSHIY – Imom Buxoriy xalqaro stipendiya dasturi sovrindori, Jakarta Qurʼon ilmlari universiteti tadqiqotchisi (Indoneziya):

Assalomu alaykum va rahmatullohi va barakotuh!

Avvalo, Samarqanddagi Imom Buxoriy xalqaro ilmiy-tadqiqot markaziga samimiy minnatdorlik bildirmoqchiman. Iliq kutib olganingiz va taqdim etilgan barcha qulayliklar uchun tashakkur. Bu yerdagi tajriba men uchun unutilmas va nihoyatda goʻzal boʻlmoqda.

Indoneziyadan Ahmad Havoshiyman. Jakartadagi Qurʼon ilmlari universiteti tadqiqotchisiman. Ushbu muborak Markazda ilmiy tadqiqot olib borish imkoniyatiga ega boʻlganimdan benihoya baxtiyorman.
Tadqiqotim muhim mavzuga bagʻishlangan boʻlib, “XX asrda Nusantarada tafsir adabiyotining rivojlanishiga “Sahihul Buxoriy”ning taʼsiri” deb nomlanadi.

Maʼlumki, “Sahihul Buxoriy” Qurʼoni karimdan keyingi eng ishonchli manba hisoblanadi. XX asrda Indoneziya ulamolari mahalliy tillarda tafsir asarlari yaratishga katta eʼtibor qaratgan. Ular oyatlarning maʼnolarini anglash va nozil boʻlish sabablarini oʻrganishda “Sahihul Buxoriy”dan keng foydalangan.

Bundan tashqari, Imom Buxoriyning hadislarni saralash va ularga yondashish metodologiyasi ulamolarimizga zaif hadislar va isroiliyot rivoyatlarini tadqiq etishda katta yordam bergan.

Shu maʼnoda, “Sahihul Buxoriy” Oʻzbekiston ulamolari bilan Janubi-Sharqiy Osiyodagi musulmon jamoalarini bogʻlovchi muhim ilmiy-maʼrifiy koʻprik vazifasini bajarib kelmoqda.

Ushbu tadqiqot orqali ilm-fanga foydali hissa qoʻshish niyatidaman. Shuningdek, bu ish Indoneziya bilan Oʻzbekiston oʻrtasidagi ilmiy-madaniy aloqalarni yanada mustahkamlashga, olimlarimiz uchun hamkorlikning yangi koʻpriklarini barpo etishga xizmat qilishidan umidvorman.

Mehmondoʻstligingiz va samimiy qabul uchun yana bir bor chin qalbimdan minnatdorlik bildiraman.

Alloh Oʻzbekistonni va Imom Buxoriy xalqaro ilmiy-tadqiqot markazini hamisha oʻz panohida asrasin, ilmiy saʼy-harakatlaringizga baraka ato etsin!

Vassalomu alaykum va rahmatullohi va barakotuh!

(TAS-IX) HD da:
bukhari.uz/

Yaqinlaringizga ulashing!