Rossiya Federatsiyasining “Skolkovo” jamgʻarmasi raisi Innovatsion rivojlanish vazirligiga tashrifi

“Skolkovo” jamgʻarmasi raisi Innovatsion rivojlanish vazirligiga tashrif buyurdi
6-aprel kuni Rossiya Federatsiyasining “Skolkovo” jamgʻarmasi raisi Arkadiy Dvorkovich Innovatsion rivojlanish vazirligiga tashrif buyurdi. Tashrif avvalida A. Dvorkovich startap loyihalar doirasida yaratilgan ishlanmalar, tayyor mahsulotlar va sanoat namunalari koʻrgazmasi bilan tanishdi.

Soʻngra A. Dvorkovich Innovatsion rivojlanish vazirligi tomonidan moliyalashtirilgan startap loyihalar mualliflari bilan uchrashib, ular bilan suhbat qurdi, yoshlarning savollariga javob berdi. Xususan, “Skolkovo” jamgʻarmasi raisi oʻzi erishgan marralarga yetish uchun nimalar qilish lozim, degan savolga quyidagicha javob berdi:

– Avvalo taʼlim. Men matematika maktabida oʻqiganman, keyin, albatta, oliy taʼlim.Odam qaysi sohada ishlamasin, matematik fikrlash muvaffaqiyat sari eltadi, deb hisoblayman. Ikkinchidan, jamoa. Men oʻzim shakllantirgan jamoalarda ham, mavjud jamoalarda ham faoliyat yuritganman. Jamoaning malakasi, jipsligi va maqsadga yoʻnaltirilgani koʻp narsani hal qiladi. Va albatta, mehnat. 28 yoshimda hukumatda faoliyatimni boshlaganimda kuniga 20 soat ishlardim.

Uchrashuvning ikkinchi qismida Oʻzbekiston rivojlanish vaziri Ibrohim Abdurahmonov va “Skolkovo” jamgʻarmasi raisi Arkadiy Dvorkovich oʻrtasida muzokaralar boʻlib oʻtdi. Muzokaralar natijasida tomonlar hamkorlikda startap loyihalar tanlovlarini oʻtkazishga kelishdilar.

“Skolkovo” jamgʻarmasining startap loyihalarni venchur moliyalashtirishdagi tajribasini inobatga olgan holda, I. Abdurahmonov jamgʻarmani “UzVC” milliy venchur fondiga boshqaruv kompaniyasi tanlovida ishtirok etishga taklif etdi. Taʼkidlash joizki, “Skolkovo” jamgʻarmasi 2000 dan ziyod startap loyihalarni qoʻllab-quvvatlab, ularga 140 mln dollar investitsiya kiritilgan hozirda esa ularning daromadi 800 mln. dollarni tashkil etadi. Mazkur startaplar 28 mingta ish oʻrinlarini tashkil etishga va 150 ta innovatsion mahsulotlarga patent olishga xizmat qildi.

Shuningdek, tomonlar Innovatsion rivojlanish vazirligiga “Skolkovo” jamgʻarmasi tomonidan venchur moliyalashtirish boʻyicha maslahatchi lavozimini joriy etish masalasini ham muhokama qildilar. “Skolkovo” texnoparki tajribasidan kelib chiqqan holda Oʻzbekistonda innovatsion texnoparklarni takomillashtirsh, axborot texnologiyalari sohasida startaplarning rivojlanishi uchun maqbul ekotizimni yaratish borasida fikrlar almashildi.

Oʻzbekiston Respublikasi Innovatsion rivojlanish vazirligi tomonidan tashkil etilgan “CAT Science” Ilmiy startaplar platformasi “Skolkovo” xorijiy akseleratorlari bilan hamkorlik oʻrnatgan boʻlib, “Skolkovo” bilan hamkorlik doirasida oʻzbekistonlik 25 ta startap loyihalari mualliflari “Softlending” dasturida ishtirok etgandi. Dasturning samarali oʻtgani va erishilgan natijalarni inobatga olib, uchrashuvda tomonlar Innovatsion rivojlanish vazirligi huzuridagi Yoshlar akademiyasi aʼzolari va yosh startapchilar uchun “Softlending” dasturini davom ettirishga kelishdilar. Shuningdek, jamgʻarma bilan hamkorlikda oʻtkazilishi rejalashtirilgan va oʻtgan yili pandemiya tufayli oʻtkazilmagan “Startap tur” joriy yilning kuz oylarida tashkil etish maʼqul deb topildi.

Bundan tashqari, tomonlar Innovatsion rivojlanish vazirligi koʻrgazmalar zalida ““Skolkovo” burchagi»ni tashkil etish lozimligini qayd etdilar. A. Dvorkovich jamgʻarma tomonidan tibbiyot sohasidagi innovatsion ishlanma va texnologiyalarni koʻrgazma uchun taqdim etilishini aytdi.

Uchrashuv doʻstona ruhda oʻtdi.