Qasoskorlar 3

«Qasoskorlar: Abadiyat jangi» — 2018-yilda chiqarilgan, Marvel olamidagi barcha qahramonlarni yagona dushman qarshisida birlashtirgan eng daxshatli va keng ko‘lamli filmdir. Syujet markazida koinotdagi barcha tirik mavjudotlarning yarmini yo‘q qilishni maqsad qilgan qudratli super-yovuz Tanos turadi. U o’z rejasini amalga oshirish uchun cheksiz kuchga ega bo‘lgan 6 ta «Abadiyat toshi»ni koinot bo‘ylab yig‘ishni boshlaydi. Qasoskorlar, Doktor Strenj, O‘rgimchak-odam va Galaktika qo‘riqchilari uning bu dahshatli niyatiga to‘sqinlik qilish uchun Yerda va koinotda shafqatsiz jangga kirishadilar. Biroq, barcha toshlarni to‘plashga erishgan Tanos yakunda barmoq silkish orqali koinot aholisining, jumladan, ko‘plab superqahramonlarning yarmini ham kulga aylantiradi.