Patrul-post xizmati xodimlari uchun o‘quv-amaliy seminar tashkil etildi

Jamoat tartibini saqlash, fuqarolarning tinchligi va xavfsizligini ta’minlash maqsadida IIV Huquqiy statistika bosh markazi mas’ul mutaxassisi ishtirokida Qashqadaryo viloyati IIB Jamoat xavfsizligi xizmati Jamoat tartibini saqlash boshqarmasi patrul-post xizmati xodimlari uchun o‘quv-amaliy seminar o‘tkazildi. Seminar davomida xodimlarga jamoat joylarida xizmat olib borishda fuqarolar bilan xushmuomala munosabatda bo‘lish, muomala madaniyati, kasbiy mahorat va huquqiy bilimlarni muntazam oshirib borishning ahamiyati tushuntirildi. Shuningdek, jamoat joylarida huquqbuzarlik sodir etgan shaxslarga nisbatan ma’muriy bayonnomalarni qonun talablari asosida rasmiylashtirish tartibi, xizmatda qo‘llanilayotgan texnik vositalardan samarali foydalanish, «E-ma’muriy ish» elektron platformasida ishlash, qarorlarni belgilangan muddatlarda qonuniy qabul qilish tartibi bo‘yicha atroflicha tushunchalar berildi. Bundan tashqari, huquqbuzarlarga nisbatan ma’muriy choralar qo‘llash jarayonida «E-jarima» hamda «Mening jarimalarim» mobil ilovalaridan foydalanish tartibini fuqarolarga tushuntirish, ular o‘rtasida targ‘ibot va profilaktika ishlarini samarali tashkil etish yuzasidan ham tegishli tavsiyalar berildi.
Ta’kidlanganidek, bunday o‘quv-amaliy seminarlar xodimlarning huquqiy ongi, kasbiy salohiyati va xizmat intizomini yanada mustahkamlash, ichki ishlar organlari imijini yuksaltirish hamda aholi roziligiga erishishga xizmat qiladi.